Азиадада алтын алған Владислав Киреев: Бүгін ойымыздағының бәрін жүзеге асырдық

АСТАНА. KAZINFORM – Қытайда өтіп жатқан ІХ қысқы Азия ойындарында биатлоннан алтын алған Владислав Киреев жарыстың қалай өткені және жеңістен кейінгі әсерімен бөлісті, деп хабарлайды Kazinform тілшісі ҰОК-ке сілтеме жасап. 

— Бүгін ойлағанымыздың бәрін іске асыра алдық. Бізге бұл жүлденің маңызы жоғары.  Дайындығымыздың нәтижесін көрсете алдық. Бірінші орынды да, екінші орынды да қанжығамызға байладық, - дейді Владислав Киреев. 

Десе де өз сөзінде ол бастапқыда доданың сәтсіз басталғанын жеткізді.

— Жарыстың қалай өткеніне қатысты айтар болсақ, алғашқы ату алаңына жеткенде бірінші атқан оғым мүлт кетті. Себебі дәл атайын деп жатқанда жел соғып, кедергі келтірді. Бұл сол кездегі басты кемшілігім болды деп ойлаймын. Ал қалғанының бәрі жақсы болды. Көп артта қалып қалмадым. Бапкерлер мені қашықтықта бағыттап отырды. Басталғандағы жылдамдығым тез болмады. Бірақ бастай салғандағы жылдамдық — үнемі жақсы бола бермейді. Жылдам бастап, мәреге баяу жетіп жататындар болады. Сондықтан мен орташа қарқынды таңдадым, - дейді спортшы.

Бірінші айналымда жеңіліп келе жатқанмын. Арадағы алшақтық аз болды — шамамен 9 секундтай.

— Айып шеңберін айналған бойда ату алаңынан шықтым. Ары қарай қарқынды үдетіп, жете бердім. Сөйтіп, басып озып, алтын медаль алдым. Бұл дода басындағы маңызды жеңіс. Тек мен үшін емес, бүкіл Қазақстан үшін, еліміздің спортшылары үшін. Азия ойындары — екінші Олимпиада. Сондықтан кез келген медальдың маңызы зор. Бастысы, бірінші және екінші орын да біздің қоржынымызға түсті, - дейді Владислав Киреев. 

Оның айтуынша, бұл жеңіс алдағы жарыстарда спортшыларымызға сенімділік береді. 

— Бізде босаңсуға уақыт жоқ. Ары қарай әлем чемпионаты мен әлем кубогі өтеді. Осылай өнер көрсетуді жалғастырып, Олимпиада ойындарына жолдама алу үшін ұпай жинауымыз қажет. Осы ретте, жеңіс тұғырында жолдастарыңмен бірге тұрғанның ғанибет еткенін айтқым келеді.

Әсіресе, халықаралық турнирлерде. Вадимді медалімен құттықтаймын. Мен жалғыз емес, бірге жаттығып, талай сәттерді бастан өткерген адаммен жеңіс тұғырына бірге көтерілгеніме қуаныштымын, - дейді биатлоншы. 

Еске салсақ, бұған дейін биатлоннан Қазақстан ерлер құрамасы алтын және күміс медаль еншілегенін хабарлаған едік.