«Азық-түлік келісімшарт корпорациясы» АҚ 500 мың тонна бидайды тасымалдауды 2012 жылға қалдырады

АСТАНА. 27 желтоқсан. ҚазАқпарат /Қанат Мәметқазыұлы/ - 2011 жылғы астық дақылдарының жоғары өнімділігіне байланысты «Азық-түлік келісімшарт корпорациясы» АҚ 500 мың тонна бидайды тасымалдауды 2012 жылға ауыстыру туралы шешім қабылдағанын жариялайды.

Бұл туралы аталмыш компанияның баспасөз қызметінен хабарланды.

«2012 жылғы жаңа өнімді қабылдау бойынша бидайға толы элеваторларды босату үшін биылғы астық егін егетін облыстардың элеваторларынан еліміздің басқа да өңірлеріне қарай тасымалданатын болады. Астықты тасымалдау үшін қаражат Үкіметтің резервінен 2012 жылы бөлінетіні қарастырылады», - делінген баспасөз айғағында.

Естеріңізге сала кетейік, биыл тәуелсіздік жылдары ішінде рекордты астық орылып, қамбаға құйылған бидай салмағы 29 млн. тоннадан асқан болатын. Бұл шамамен 2 млрд. пұт астық.