Б.Сағынтаев: 15 қазанда барлық тұрғын үй қоры жылу беру маусымына дайын болуы тиіс
Оның атап өтуінше, бүгінгі Үкімет отырысында жылу бер маусымына дайындық, егін науқаны барысы және жекешелендіру мәселесі жан-жақты талқыланған.
«Биылғы жылы 9 энергоблокқа, 59 энергетикалық қазандыққа және 47 трубинаға күрделі жөндеу жұмыстарын жүргізу жоспарланған. Бүгінгі таңда 5 энергоблокта, 38 қазандыққа және 26 трубинаға жөндеу жұмыстары аяқталды. Жұмыстар кесте бойынша жүргізілуде. Қазандықтардың жай-күйіне қатысты айтсам, әкімдіктер қуаты 100 Гкалға дейінгі 5030 қазандыққа жөндеу жұмыстарын жоспарлаған. Оның ішінде жөнделгені бүгінгі күнге 97 пайыз», - деді ол.
Б.Сағынтаевтың айтуынша, 3,7 мың шақырым жылу желісі жөнделген, бұл жоспарланған деңгейдің 97 пайызын құрайды. Сумен жабдықтау және су бұру желілерінің жоспарланған көлемінің 95 пайызы жөнделген. Электр желілерін жөндеу де кесте бойынша жүргізілуде.
«Білім беру нысандарының барлығы, яғни 10720-сы жөндеуден өткізілді. 6707 денсаулық сақтау нысанының 6688-і, яғни 99 пайызы жөнделді. Тұтастай алғанда, денсаулық сақтау және білім беру нысандарындағы жоспарланған жөндеу жұмыстары кестеге сәйкес жүргізілуде. Тұрғын үй қоры бойынша жұмыс кесте бойынша белгіленген мерзімнен кешіктірілмей жүргізілуде. Яғни, 15 қазанда барлық тұрғын үй қоры жылу беру маусымына дайын болуы тиіс», - деді ол.