Б.Сапарбаев «Болашақ» бағдарламасының стипендиаты атанғандарға сертификаттар табыстады
АСТАНА. ҚазАқпарат - Бүгін Астанада жас мамандар форумында Премьер-Министрдің орынбасары Бердібек Сапарбаев «Болашақ» стипендиясының қатарын жақында ғана толықтырған жастарға сертификаттар табыстады.
«Болашақ» бағдарламасы Елбасының бастамасымен 1993 жылы құрылғанын еске салып өткен вице-премьер: «Ол әлемнің жетекші жоғары оқу орындарында кадрларды даярлау жөніндегі бірінші бағдарлама болды. Өз кезегінде бағдарлама 8 мыңға жуық білікті мамандарды даярлауға мүмкіндік берді», - деді.
Сонымен қатар Білім және ғылым министрі Аслан Сәрінжіпов халықаралық және республикалық олимпиадалардың жеңімпаздарына естелік сыйлықтарды табыс етті.
Айта кетейік, форумға 400-ден астам «Болашақ» президенттік бағдарламасының түлектері, «Дарын» және «Жас тұлпар» жастар сыйлықтарының лауреаттары, сондай-ақ халықаралық олимпиадалардың жеңімпаздары қатысты.
