БАӘ-де Өзбекстанның үш азаматы өлім жазасына кесілді
АСТАНА.KAZINFORM - Сот лаңкестік әрекет деп таныған Әмірліктердегі еврей қауымы өкілін өлтіру ісі бойынша үкім шықты, деп хабарлайды Kazinform агенттігінің меншікті тілшісі.
Дүйсенбі, 31 наурыз күні Абу-Дабидегі Федералды апелляциялық сот Молдова азаматы израильдік Цви Коганды ұрлап өлтіргені үшін үш ер адамды өлім жазасына, төртіншісін өмір бойына бас бостандығынан айыруға үкім шығарды.
Бірауыздан қабылданған үкім сотталушыларды террористік ниетпен қасақана кісі өлтірді деп айыптады, деп хабарлайды WAM ақпараттық агенттігі.
Біріккен Араб Әмірліктерінің бас прокуроры Хамад Саиф әл-Шамсидің 2025 жылдың қаңтарында сот талқылауын өткізуге шақырған бұйрығынан кейін бұл іс жылдам қаралды.
БАӘ мемлекеттік қауіпсіздік прокуратурасының тергеуі айыпталушының Коганды нысанаға алып, қасақана шабуыл жасағанын анықтады. Сотқа елеулі айғақтар, соның ішінде айыпталушының толық мойындауы, сот-медициналық сараптама қорытындылары, сараптама нәтижелері, қылмыс қаруы және куәгерлердің сөздері ұсынылды.
Сот негізгі үш қылмыскерді өлім жазасына кесті. Ал оларға көмектескен төртінші сыбайласы жазасын өтеген соң елден жер аударылып, өмір бойына бас бостандығынан айырылды. БАӘ заңына сәйкес, өлім жазасына кесілген үкімдер автоматты түрде апелляцияға беріледі және оны Федералды Жоғарғы Соттың қылмыстық бөлімі қарайды.
Үкім шығарылғаннан кейін Бас прокурор Әл Шамси бұл үкім БАӘ-нің ең жоғары әділеттілік стандарттары мен заң үстемдігіне сәйкес лаңкестікпен күресу, сонымен бірге әділ сот кепілдігін қамтамасыз етудегі мызғымас ұстанымын көрсететінін баса айтты.
Ол БАӘ сот жүйесі ұлттық қауіпсіздік пен тұрақтылыққа нұқсан келтіру әрекеттеріне табанды түрде қарсы тұратынын атап өтті.
Сонымен қатар Бас прокурор Біріккен Араб Әмірліктері бірге өмір сүру мен толеранттылықтың жаһандық үлгісі болып табылатынын, онда заңдар діні мен этникалық тегіне қарамастан барлық тұрғынды қорғайтынын, олардың қауіпсіздігін қамтамасыз ететінін қоса айтты.
Айта кетейік, 2024 жылдың 26 қарашасында БАӘ билігі Израиль және Молдова азаматы Цви Коганды өлтірді деген үш күдіктіні қамауға алған болатын. Жоғалған адамның денесі 24 қарашада Әл-Айн қаласынан табылды.
БАӘ-де өмір сүрген Коган бүкіл әлем бойынша филиалдары бар православиелік еврей тобының өкілі болды.
Израиль премьер-министрі Биньямин Нетаньяху кеңсесі бірден Коганның өлтірілуін айыптап, оны «антисемиттік лаңкестік әрекет» деп атады.
Бұған дейін Судан БАӘ-ге қарсы халықаралық сотқа шағым түсіргенін жазған болатынбыз.
