Бағаларға сай келмейтін жәрдемақы мәселесін шешуіміз қажет – Асхат Аймағамбетов

АСТАНА. KAZINFORM – Мәжіліс депутаты Асхат Аймағамбетов палатаның жалпы отырысында әлеуметтік саладағы уақыт күттірмей шешуді қажет ететін проблемаларды атады.

- Тағы бір үлкен сұрақ – жүздеген мың азаматтық қызметкерлердің жалақысының төмендігі мен мүгедектігі бар 500 мың жанның, бүгінгі нарық пен бағаларға сай келмейтін жәрдемақы мәселесін де болашақта шешуіміз қажет.

Президент Ұлттық Құрылтайда «Адал азамат» пен ұрпақ тәрбиелеу мәселесіне ерекше тоқталды. Енді мұғалімдер мен бүкіл қоғам сапалы білім мен саналы тәрбие жұмыстарын одан әрі күшейтуі керек, - деді депутат.

Сондай-ақ, ол міндетті әлеуметтік медициналық сақтандыру жүйесі әлі жетілдіру керек екенін еске салды. 

- МӘМС-пен қамтылмаған 3,5 млн азамат, сапалы медициналық көмекке қол жеткізу, реттелмеген тарифтер сияқты проблемалар бар. Бұл мәселелерге Мемлекет басшысы арнайы тоқталып, тиісті тапсырмаларды берді, - деді Асхат Аймағамбетов.

Айта кетейік, бүгінгі Мәжіліс жиынында Президент Қасым-Жомарт Тоқаевтың саяси реформасы талқыланып жатыр. Оған палата депутаттарынан бөлек, ғалымдар мен сарапшылар, БАҚ басшылары қатысып отыр.