БАҚ: Израиль парламенті әскер шығынына қосымша $9 млрд бөлуді мақұлдады

АСТАНА. KAZINFORM – Израиль Парламенті әскери шығындарға қосымша 31 млрд шекел (9 млрд доллардан астам) бөлу туралы заң жобасын мақұлдады, деп хабарлайды Анадолы.

Израильдің Calcalist басылымының хабарлауынша, Кнессет (парламент) алғашқы дауыс беру кезінде 30,8 миллиард шекельді (шамамен 9,23 миллиард доллар) құрайтын қосымша бюджетті мақұлдады. Бұл қаражат негізінен елдің қауіпсіздік қажеттіліктеріне бағытталады.

120 депутаттың ішінде 42-сі қолдап, 37-сі қарсы дауыс берген. Заң күшіне енуі үшін ол екінші және үшінші оқылымда да мақұлдануы қажет.

Дауыс беру арнайы пленарлық отырыста өтті.

Ол Үкімет пен премьер-министр Биньямин Нетаньяхудың харедим өкілдерін (дін өкілдері) әскерден босатуды заңдастыру туралы уәдесін орындамағаны үшін наразылық ретінде шілде айында коалициядан кетіп қалған екі ультраортодоксалды партия арасындағы саяси келісім аясында өтті.

Келісімге сәйкес, «Тора бірлігі» партиясы (7 мандат) дауыс беруге қатысқан жоқ, ал «ШАС» партиясы (11 мандат) заң жобасын қолдады. Сонымен қатар, осы келісім аясында Дін істері министрлігіне 80 миллион шекель (шамамен 24 миллион доллар) бөлу қарастырылған.

Yedioth Ahronoth басылымы атап өткендей, қорғаныс бюджетін ұлғайту қажеттілігі күтпеген шығындарға, соның ішінде 2025 жылдың 13–24 маусымы аралығында Иранға қарсы әскери әрекеттерге және Израиль армиясының ауқымды сатып алуларына байланысты болған.

Осыған дейін Израиль Доха шабуылы үшін жауапкершілікті толық өз мойнына алғаны туралы жаздық.