Бақауов: Құрылыс мерзімі бір күнге кешіксе, мердігерлермен келісімшарт бұзылады

АСТАНА. ҚазАқпарат - Павлодар облысында құрылыс жұмыстарының бір күндік ауытқуы орын алса, мердігерлермен келісімшарт бір жақты түрде бұзылатын болады. 

 Аймақ басшысы Болат Бақауов облыс әкімдігінде өткен құрылыс алқасының жиынында осындай тапсырманы берді, деп хабарлайды pavlodarnews.kz.

Павлодар облысының құрылыс, жолаушылар көлігі және автомобиль жолдары басқармасы басшының міндетін атқарушы Рүстем Раисовтың айтуынша, ведомство қаладағы бассейн мен Таволжан ауылындағы емхананың құрылысын аяқсыз қалдырған «Керемет» ЖШС-мен келісімшарт күшін тоқтата алмай әлек.   - Заң бойынша мердігер құрылыс бойынша жалған ақпарат бергенде ғана келісімшартты бұзуға болады. Ал, бізде екі жылдық құжатқа қол қойылған, - деді Рүстем Раисов.  -Сіздер келісімшартты қалай жасайсыздар?, - деп сұрады Болат Бақауов. «Құжатты жасағанда құрылыс уақытын бір күнге бұзу туралы пункті қосып, келісімшарттардың күшін жойғызыңдар. Былтыр біз мердігерлердің қара тізімін құрамыз деп едік. Қайда ол? «Керемет» өз жұмысын жасай алмай жатыр деп қайда көрсеттік? Олар ұтып алған жерде біз құрылысты жасап жатырмыз».