Бакуде тұрып жатқан қандастарымызбен кездесу өтті
Бұл туралы «ҚазАқпарат» ХАА тілшісі хабарлайды.
«Тәуелсіздіктің 25 жылдығына арналған жобаның мақсаты - шетелде тұратын отандас жастар мен жас дарындардың шығармашылығын дамытуға ықпал ету, талантты жастарды іздестіру, оларға ҚР Президенті Нұрсұлтан Назарбаевтың Жолдауы мен «100 нақты қадам» Ұлт жоспарын түсіндіру», - деді қоғамдық бірлестігінің төрайымы Анар Шәмшадинова.
Шетелдегі қазақ диаспорамен кездесулер, Маңғыстау облыстық Ішкі саясат басқармасының «Шетелде тұратын отандастармен әлеуметтік және мәдени байланыстарды дамыту жөніндегі іс-шараларды өткізу» жобасы аясында өткізілуде.
Айта кеткен жөн, бұл еліміз бойынша алғашқы қолға алынып жатқан жоба, сондықтан бастапқыда танысу және ақпараттандыру бойынша шетелдегі қазақ диаспора өкілдері арасынан пул құрып, қарым-қатынасты нығайтуға баса назар аударылып отыр.
Бұған дейін Мәскеуде қазақ диаспорасымен кездесу ұйымдастырылған, сондай-ақ Ресейде оқитын мыңдаған қазақстандық студенттермен жүздескен. 
Төрайымның ерекше атап өткені, қандастарымыздың өзге мемлекеттерде де үлкен деңгейге жетіп, білімділігі мен біліктіліктерінің арқасында өз орындарын ойып алғандары.
Кездесу барысында Маңғыстау облысының саяси-әлеуметтік жетістіктері туралы бейнеролик көрсетілді.
Залдағы қатысушыларды ерекше толқытқаны, ол - домбыраның күмбірлеген үні. Олар «Сүгірдің термесін» орындаған «Жаңа Өмір» газетінің тілшісі Мұратбек Қадырбаевтың және «Атамекен» әнін шырқаған ҚР мәдениет сіңірген қайраткері Нұрияш Оспанованың өнерлеріне тәнті болды.
Бекбау Тайманов