Балалар өлімімен күрес баяулады - ЮНИСЕФ
АСТАНА.KAZINFORM – Дүниежүзілік денсаулық сақтау ұйымы (ДДҰ) мен ЮНИСЕФ мәліметі бойынша 2024 жылы 5 жасқа дейінгі 4,9 миллион бала, оның ішінде 2,3 миллион жаңа туған нәресте көз жұмды. Бұл өлімнің көпшілігінің алдын сапалы медициналық көмекпен алуға болатын еді, бірақ оған қаржыландыру азайып келеді, деп хабарлайды DW.
БҰҰ бүкіл әлемде балалар өлімі азаймай тұрғанын жариялады. Дүниежүзілік денсаулық сақтау ұйымы (ДДҰ) мен Біріккен Ұлттар Ұйымының Балалар қорының (ЮНИСЕФ) бірлескен есебіне сәйкес, 2024 жылы бүкіл әлемде 5 жасқа дейінгі 4,9 миллион бала, оның ішінде 2,3 миллион жаңа туған нәресте қайтыс болған.
Екі ұйымның мәліметі бойынша, 2000 жылдан бері бес жасқа дейінгі балалар өлімі екі есе азайған, бірақ балалар өлімінің төмендеу қарқыны 2015 жылдан бері 60 пайыздан астам баяулаған.
Әсіресе Оңтүстік Африкада балалар өлімінің ең жоғары деңгейі байқалады.
2024 жылы әлемнің бірнеше аймағында балалар өлімі ең жоғары деңгейге жетті. Мұндай өлімнің 58 пайызы Оңтүстік Африкада, 25 пайызы Оңтүстік Азияда тіркелді. Оның көпшілігінің сапалы медициналық көмекпен алдын алуға болатын еді.
Есепте айтылғандай, 2024 жылы көз жұммған балалардың ішінде 100 мыңы азық-түлік жетіспеушілігінен зардап шеккен. Алайда, зерттеу авторларының жазуынша, тамақтанудың жанама салдарын, мысалы, оның иммундық жүйеге кері әсерін ескерсек, нақты көрсеткіштер «айтарлықтай жоғары».
Мерзімінен бұрын босану, инфекция және азық-түлік жеткіліксіздігі
Жаңа туған нәрестелер өлімінің негізгі себептері - мерзімінен бұрын босануға байланысты асқынулар (жағдайлардың 36%) және босану кезіндегі асқынулар (жағдайлардың 21%). Өмірдің алғашқы айынан кейін балалар жұқпалы аурулардан, әсіресе безгек, сондай-ақ ауыр диарея мен пневмониядан қайтыс болады.
ДДҰ вакцинация, аштықпен күрес және тиісті акушерлік көмек көрсету сияқты «дәлелденген және қолжетімді шараларды» әлемдік денсаулық сақтаудағы ең тиімді шаралардың қатарына жатқызады.
Денсаулық сақтау қызметтеріне қолжетімділікті арттыру қажет
Зерттеу авторлары балалар өлімімен күресу үшін, әсіресе сапалы медициналық көмекке қолжетімділікті жақсарту арқылы күшейтілген шараларды қолдануға шақырды. ЮНИСЕФ атқарушы директоры Кэтрин Рассел бұл тұрғыда жаһандық қаржыландырудың қысқаруын сынға алды.
- Ешбір бала біз алдын ала алатын аурулардан өлмеуі керек. Бірақ біз балалардың өмір сүруіндегі прогрестің баяулап бара жатқанының алаңдатарлық белгілерін көріп отырмыз, бұған жаһандық бюджеттің қысқаруы басты себеп, - деді ол.
Біз бұған дейін Қазақстан мен ДДҰ семіздік эпидемиясымен күресу үшін күш біріктіргенін жазған едік.
