Балалар жылында бүлдіршіндерді қолдау бағытында қандай шаралар ұйымдастырылды
АСТАНА. ҚазАқпарат – Орталық коммуникациялар қызметінде өткен брифингте Оқу-ағарту вице-министрі Ғани Бейсембаев Балалар жылында атқарылған жұмыстардың қорытындысын жариялады, деп хабарлайды ҚазАқпарат тілшісі.
«Президенттің 2022 жылды Балалар жылы деп жариялауы туралы Жарлығының негізінде Үкімет қаулысымен ағымдағы жылғы іс-шаралар жоспары қабылданғаны белгілі. Жоспарда 7 бағыт бойынша 66 іс-шара қамтылған. Осыған сәйкес, өңірлік, аудандық және қалалық жоспарлар бекітілді. Балалар жылында 4 790 718 бала білім беру, денсаулық сақтау, әлеуметтік қорғау, мәдениет және спорт салаларындағы түрлі шығармашылық, зияткерлік, спорттық, сауықтыру және әлеуметтік жалпы алғанда 500 мың түрлі іс-шаралармен қамтылды. Жалпы, Балалар жылын іске асыруға 12 орталық, 20 жергілікті мемлекеттік орган, 130 үкіметтік емес, 20 мыңнан аса оқу ұйымдары қатысты», - деді Ғани Бейсембаев.
Вице-министр жұмыстарды қорытындылай келе, Тәуелсіздік жылдары Қазақстан балалардың құқығын қорғау жөніндегі 15 халықаралық құжатты ратификациялағанына тоқталды. Оның алғашқысы - Бала құқықтары туралы Конвенция болды. Сонымен қатар балалар мен жасөспірімдердің құқықтары мен кепілдіктерін реттейтін 50-ге жуық нормативтік құқықтық актілер қабылданып, күшіне енген.
