Бали маңында паром апатынан қаза тапқандар арасында қазақстандықтар жоқ – СІМ

АСТАНА. KAZINFORM – Қазақстанның Сыртқы істер министрлігі Индонезиядағы Бали аралының маңында жолаушылар паромы апатқа ұшырауына қатысты түсініктеме берді.

Бұған дейін паромның Ява аралынан шыққаннан кейін шамамен 25 минут өткенде суға батып кеткені хабарланған еді. Reuters агенттігінің мәліметінше, апат салдарынан төрт адам қаза тапқан, 30 адам хабар-ошарсыз кеткен, тағы 31 адам құтқарылған. Құтқару қызметтері іздестіру жұмыстарын жалғастыруда.

Индонезияның іздестіру-құтқару басқармасы кеменің батуына қозғалтқыштағы ақау себеп болғанын мәлімдеді. Паромда 53 жолаушы мен 12 экипаж мүшесі болған.

«Алдын ала ақпарат бойынша, қаза тапқандар мен зардап шеккендер арасында Қазақстан азаматтары жоқ», – деп хабарлады ҚР Сыртқы істер министрлігі.

Айта кетейік, Индонезияда ұсталған қазақстандықтарға адвокаттар іздестіріліп жатыр.