Балқаштың айналма жолында сервистік нысандар салу үшін жер учаскесі қашан беріледі – өңір әкімінің жауабы

Балқаш қаласының айналма жолы бойында салынатын сервистік объектілер үшін жер учаскелері аукцион арқылы сатылады. Бұл туралы Қарағанды облысының әкімі Ермағанбет Бөлекпаев айтты, деп хабарлайды Kazinform.

Бүгін Үкімет отырысында Премьер-Министр Әлихан Смайылов Қарағанды облысының әкімінен: «Балқаш қаласының айналма жолына сервистік объектілерді салу үшін жер учаскелерін бөлу рәсімдері созылып кетті. Бұл мәселе қалай шешіледі?», - деп сұраған еді.

Ермағанбет Бөлекпаевтың айтуынша, сервистік объектілері үшін 12,8 гектар жер учаскесі бөлінген.

«Осы жылдың желтоқсанында аталған ауданның егжей-тегжейлі жоспарлау жобасы аяқталады. 2024 жылдың 1-тоқсанында жер учаскелері аукцион арқылы сатылады», - деді өңір басшысы.