Балық шаруашылығын дамыту үшін қолданыстағы заңнаманы жетілдіру қажет
Бүгін Парламент Сенатының жалпы отырысында Үкімет басшысының атына сауал жолдаған сенатор Ғарифолла Есім осылай мәлім етті.
«Балық шаруашылығында қалыптасқан жағдайды саралап, экономиканың осы саласына Үкімет тарапынан жан-жақты қолдау көрсетудің маңызы ерекше. Өйткені, қазіргі уақытта балық шаруашылығының әлеуеті толықтай игерілмей жатыр. Бұған қоса, қолданыстағы кейбір заңнамалық актілердің арасындағы қарама-қайшылық түсінісіздікке ұрындырып, балық шаруашылығының дамуына кері әсерін тигізуде», - дейді сенатор Ғ. Есім. Оның айтуынша, бұл сала негізінен «Жануарлар дүниесін қорғау, өсімін молайту және пайдалану туралы» заңымен реттеледі. Осы заң аясындағы қаулыға сәйкес, Жайық-Каспий балық шаруашылығы бассейні бойынша жекелеген орындар мен учаскелер үшін 1 мамырдан бастап балық аулауға тыйым салынған.
«Бұл шектеуді енгізу кезінде Каспий теңізі мен Қиғаш өзендерінің трансшекаралық жағдайы ескерілмеген. Сондықтан, бұл шектеу арқылы балық қорын сақтауға және көбейтуге бағытталған түпкі мақсатқа жету мүмкін емес. Себебі аталған су айдындарынан Қазақстаннан басқа Ресей Федерациясы да балық аулайды. Ал, олардың балық аулау мерзімі ерте басталып, мамыр айының 25-не дейін, яғни бір айға жуық кеш аяқталады. Бұл, өз кезегінде, біздің отандық кәсіпорындар үшін тиімсіз. Қиғаш өзенінен ауланатын балықтың 80 пайызы көктемгі балық аулау маусымына келеді. Ресей балықшыларымен салыстырғанда балық аулау мерзімі шектеулі болғандықтан, олар теңсіз бәсекелестік жағдайында қалып отыр. Мұндай жағдай өнімнің өзіндік құнына да, ата кәсібі балық шаруашылығымен байланысты мыңдаған адамдардың тұрмыс тіршілігіне де кері әсерін тигізетіні сөзсіз», - дей келе депутат Ғарифолла Есім аталған қаулыға тиісті өзгерістер енгізіп, жергілікті балық кәсіпорындарының толыққанды жұмыс жасауына мүкіндік туғызу қажеттігін алға тартты.
Сенатордың айтуына қарағанда, балықшылар үшін ауланған балықтарды өңдеу орындарына жеткізу, оны сыртқы нарыққа шығару мәселелері де реттеуді аса қажет етеді