«Барыс» қатарынан төртінші мәрте жеңіліске ұшырады
Қазақстандық «Барыс» командасы Құрлықтық хоккей лигасындағы кезекті ойынын Ресейде ЦСКА (Мәскеу) командасына қарсы өткізді, деп хабарлайды ҚазАқпарат тілшісі.
Кездесу барысында ресейлік хоккейшілер жылдам гол соғу мүмкіндігін іздеді.
Ойынның 8-минутында ресейлік клубтан Павел Корнаухов мергендік танытты.
Ал 35-минутта Михаил Григоренко, 44-минутта Даррен Диц, Константин Окулов 56-минутта есепті үстемелей түсті.
Осылайша елордалық клуб қарсыласына 0:4 есебімен есе жіберді.
Салдарынан қатарынан төртінші мәрте жеңілістің ащы дәмін татып отыр.
Екі команда бұған дейін 29 мәрте кездесті. Оның 10-ы елордалық клубтың басымдығымен аяқталса, қалғанында ресейлік команда жеңіске жетті.
Турнир кестесінде «Барыс» 14 ойыннан кейін 10 ұпаймен 20-орында тұрса, ЦСКА 14 ойыннан кейін 13 ұпаймен 9-орынға орналасты.
«Барыс» бұдан кейін 6 қазанда «Витязь» (Подольск) клубымен шеберлік байқасады.
