«Барыс» көш басындағы «Металлургтен» басым түсті
Қазақстандық «Барыс» командасы Құрлықтық хоккей лигасындағы кезекті ойынын елордада Ресейдің «Металлург» (Магнитогорск) командасына қарсы өткізді, деп хабарлайды Kazinform.
Биылғы турнирде қазақстандық команда сәтсіз ойын көрсетіп келеді. Салдарынан турнир кестесінде соңғы 23-орынды місе тұтып тұр.
Есесіне «Металлург» жинақы ойынымен бірінші орында келеді. Команда құрамында Никита Михайлис, Максим Мухаметов, Павел Акользин сынды қазақстандық хоккейшілер ойын көрсетеді.
Кездесу басынан елордалық команда белсенді қимыл көрсетті. Нәтижесінде олардың қатарынан Алкадий Шестаков 11, Данил Апальков 21-минутта мергендік танытты.
Келесі кезекте «Металлург» сапынан Дмитрий Силантьев 28-минутта есеп айырмасын қысқартқан еді.
Астаналық командадан Эмиль Нұрғалиев 25-минутта гол соқса, 42-минутта Әлихан Өмірбеков көздеген нысанадан мүлт кеткен жоқ.
Ал қазақстандық Әділ Бекетаев 49-минутта бос қалған қақпаны дәл көздесе, ресейлік клубтан Никита Михайлис қорытынды есепті белгіледі.
Осылайша «Барыс» қарсыласынан 5:2 есебімен басым түсті.
Енді «Барыс» алдағы төрт ойынын сырт айдында өткізеді.
Алдымен 3 желтоқсанда Ресейдің «Северсталь» (Череповец) клубымен кездессе, одан кейін 5 желтоқсанда «Авангард» (Омбы), 7 желтоқсанда «Сибирь» (Новосібір), 19 желтоқсанда «Салават Юлаев» (Уфа) клубтарымен шеберлік байқасады.
Еске салсақ, бұдан бұрын елордалық клуб елордада «Витязь» командасына есе жіберді.
