«Барыс» жетінші мәрте жеңілістің ащы дәмін татты
АСТАНА. KAZINFORM — Қазақстандық «Барыс» командасы бүгін Құрлықтық хоккей лигасындағы кезекті ойынын елордада Ресейдің «Динамо» (Мәскеу) командасына қарсы өткізді.
Елордалық клуб жаңа маусымды сәтсіз бастады. Жеті кездесудің алтауында қарсыластарына есе жіберіп қойды. Салдарынан турнир кестесінде ең соңғы орынды місе тұтып тұр.
Жаңа маусым алдында бас бапкер қызметіне тағайындалған Дэвид Немировски команданы жеңіске жетелей алған жоқ. Салдарынан команда басшылығы оны қызметінен шеттетті.
Бүгінгі ойында бас бапкер міндетін Евгений Королев атқарды.
Десе де бұл жолы да «Барыс» жанкүйерлер сенімінен шыға алған жоқ. Ойынның 5-минутында ресейлік клубтан Никита Гусев есеп ашса, Джордан Уил 26-минутта басымдықты арттырды.
Ал елордалық командадан 28-минутта Әлихан Өмірбеков есеп айырмасын қысқартса, Никита Гусев 43-минутта тағы бір мәрте көзге түсті.
Осылайша «Барыс» қарсыласына 1:3 есебімен есе жіберіп, сәтсіздік сериясын жалғастырды.
Енді қазақстандық команда бұдан кейінгі үш ойынын елордада өткізеді.
Алдымен 26 қыркүйекте Ресейдің «Сочи» клубымен ойнаса, одан кейін 28 қыркүйекте «Витязь» (Подольск), 30 қыркүйекте «Торпедо» (Нижний Новгород) командаларымен кездеседі.
