Прокурорлар білім саласы бойынша 8 млрд теңге шығынды анықтады
АСТАНА. KAZINFORM – Балабақша, мектеп және колледждерге жүргізілген ауқымды тексеру нәтижесінде 207 қылмыстық іс қозғалды. Бұл туралы еліміздің Бас прокуратурасы хабарлайды.
Қазақстан Республикасының Бас прокуратурасы мектепке дейінгі, жалпы орта және арнайы орта білім беру мекемелеріне жаппай тексеру жүргізіп, оның нәтижесінде 207 қылмыстық іс қозғады.
Бұл туралы Бас прокурордың бірінші орынбасары Тимур Тәшімбаев мәлімдеді.
Оның айтуынша, бюджет қаражатын мақсатсыз пайдалану және жымқыру фактілері бойынша анықталған шығын көлемі 8 млрд теңгеден асты, яғни бірқатар заңбұзушылық анықталды.
Тексеру барысында санитарлық нормалардың, өрт қауіпсіздігінің және мектептердегі лаңкестікке қарсы қорғаныс бағытында заң бұзылғаны анықталған.
— Кейбір мектепте қауіпсіздікті қамтамасыз ету орнына ашық ұрлық жасалғаны белгілі болды, — деп атап өтті Тимур Тәшімбаев.
Сонымен қатар, прокуратура органдары балалардың құқығын қорғау мәселелерін зерттеген.
— Біз 2 мыңға жуық әртүрлі хабарлама жинадық, олардың арасында құпия, Telegram-чат арқылы түскен шағымдар да бар. Бұл жұмыс көптеген мәселе мен үрдісті анықтауға мүмкіндік берді. Нәтижесінде 190-ға жуық адам әкімшілік жауапкершілікке тартылды, ал балалардың пайдасына 4,5 млрд теңге алимент өндірілді, — деді Тимур Тәшімбаев.
Одан бөлек, тексеру барысында қиын жағдайға тап болған балаларға сапалы психологиялық көмек көрсету мәселесі де қарастырылды.
— Психологиялық көмек беру жүйесі әлсіз екені анықталды. Біріншіден, барлық оқу орнында штаттық психолог жоқ. Ал бар болған жағдайда, олардың жұмысы факультативтік, қосымша сипатқа ие. Біз психологтардың ресми жұмыс сағаты болғанын қалаймыз. Психологтардың рөлі тиісті деңгейде бағаланбай отыр, сондықтан бұл бағыттағы жұмысты күшейту қажет, — дейді ол.
Оның айтуынша, қазір құқықбұзушылықтардың алдын алу туралы жаңа заң әзірленіп жатыр, онда осы және басқа да маңызды мәселелер қарастырылады.
Айта кетейік, қазақстандықтар жемқорлық туралы хабарлағаны үшін 15,7 млн теңгеге дейін сыйақы ала алады.
