Бәсекелестікті қорғау агенттігі «Шұбаркөл көмір» кәсіпорнына ескерту жасады

АСТАНА. ҚазАқпарат - Бәсекелестікті қорғау және дамыту агенттігі «Шұбаркөл көмір» АҚ-ға Қазақстанның бәсекелестікті қорғау заңнамасын бұзуға алып келетін әрекетті жасауға жол бермеу жөнінде алдын ала ескерту жіберді, деп хабарлайды ҚазАқпарат.

Бәсекелестікті қорғау және дамыту агенттігі бұған дейін «Шұбаркөл көмір» АҚ «Modern Trading Solutions» Тауар биржасы» АҚ-ның тауар биржасын өздері өндірген коммуналдық-тұрмыстық көмірмен сауда-саттықты ұйымдастырушы ретінде айқындау жөнінде шешім қабылдағанын хабарлаған болатын.

Алайда «Modern Trading Solutions» Тауар биржасы» АҚ-ның тауар биржасының әлеуетті мүшелері үшін шамамен 95 млн теңге мөлшерінде біржолғы кіру жарнасын белгілеуіне байланысты агенттік «Modern Тrading Solutions» Тауар биржасы» АҚ-ға ҚР монополияға қарсы заңнамасын бұзуға жол бермеу туралы алдын ала ескерту жіберді.

Агенттіктің алдын ала ескертуін қарағаннан кейін біржолғы жарна мөлшері 20 млн теңгеге дейін төмендетілді, алайда көмір саудасы секциясы бойынша басқа тауар биржаларында кіру жарнасының мөлшері 150 мыңнан 3,5 млн теңгеге дейін өзгереді.

Бұл ретте «Modern Trading Solutions» Тауар биржасы» АҚ-ның бұрын қолданыста болған (2023 жылғы 23 мамырға дейін) тарифтеріне сәйкес резиденттер/резидент еместер үшін біржолғы жарна 500 мың/1 млн теңгені құрады.

Тауар биржасы арқылы өткізілетін коммуналдық-тұрмыстық көмірді сатып алушылар, кейіннен көмірді жеке пайдалану үшін халыққа сататын өңірлік көмір операторлары болып табылатынын атап өту қажет.

Бүгінгі күні «Шұбаркөл көмір» АҚ «Modern Trading Solutions» Тауар биржасы» АҚ-мен бірлесіп, 2023 жылғы қазанда биржалық тауарды жеткізумен коммуналдық-тұрмыстық көмірмен биржалық сауда-саттықты өткізу кестесі 28 тамыз - 1 қыркүйек аралығында бекітті.

Осыған байланысты агенттік «Шұбаркөл көмір» АҚ-ға Кәсіпкерлік кодексінің талаптары шеңберінде Қазақстанның бәсекелестікті қорғау заңнамасын бұзуға алып келуі мүмкін әрекетті жасауға жол бермеу жөнінде алдын ала ескерту жіберді.