Батыс Қазақстан облысында 430-дан астам үйге су кірген
ОРАЛ. KAZINFORM – Батыс Қазақстан облысында қардың күрт еріп, жауын-шашынның көп түсуінен 432 тұрғын үйдің ішіне су кірген.
БҚО ТЖ департаментінің баспасөз қызметінен мәлім еткеніндей, әсіресе, Сырым және Қаратөбе аудандарында жағдай күрделі.
Сырым ауданында Өлеңті өзенінің тасуынан Өлеңті, Жымпиты, Бұлдырты ауылдарында тұрғын үйлерді су басты. Сонымен қатар 5 елді мекенде электр желісінде болған авариялық ажырату салдарынан ұялы байланыс та болмады. Қазіргі уақытта қалпына келтіру жұмыстары жүргізілуде.
Аталған үш ауылда үйін су басқандар туған-туыстарының үйіне орналасты. Жағдайды тұрақтандыру мақсатында Алматы қаласынан 50 әскери келіп, суды тежеу және адамдарды қауіпсіз жерге көшіру үшін жұмылдырылды.
«Қаратөбе ауданында Жақсыбай өзені жағадан шығып, Қоржын ауылының тұрғын үйлерін су басқаны белгілі. Бастапқыда тұрғындар ауылдағы мектепке орналастырылған болатын. Қазіргі кезде Ақтөбеден келген 2 тікұшақпен су қоршауында қалған Қоржын ауылынан адамдар қауіпсіз жерге оқшауландырылып жатыр», - деп хабарлады ведомстводан.
«AMANAT» партиясы БҚО филиалының баспасөз қызметі «Жастар рухы» еріктілерінің Қаратөбе ауданы Қоржын ауылы тұрғындарына азық-түлікпен шығатынын, сондай-ақ облыстық және қалалық мәслихат депутаттары материалдық көмек ұйымдастырып жатқанын жеткізді. Облыстық, аудандық филиал өкілдері бір күндік жалақыларын аударуда.
Еске сала кетейік, бұдан бұрын БҚО-ның тағы бір ауданында үйлер су астында қалғанын жазған болатынбыз.
