Батыс Қазақстанда 687 әйел жатыр мойны обырымен есепте тұр
ОРАЛ. KAZINFORM – Батыс Қазақстан облысында жатыр мойны обырымен 687 әйел есепте тұрса, соның ішінде 28-і биылғы алты айда тіркелген.
БҚО Санитариялық-эпидемиологиялық бақылау департаменті басшысының орынбасары Нұрлыбек Мұстаевтың өңірлік коммуникациялар қызметі алаңында өткен брифингте мәлім еткеніндей, Үкіметтің биылғы 20 ақпандағы қаулысымен жоспарлы профилактикалық егулер тізбесіне адам папилломавирусы тудыратын ауруға қарсы егу енгізілген.
Нұрлыбек Ермекұлының сөзіне қарағанда, қатерлі ісік құрылымында жатыр мойны обыры 25-44 жас аралығындағы әйелдер арасында екінші орында тұр. Дүниежүзілік денсаулық сақтау ұйымының мәліметіне сәйкес жыл сайын әлемде 600 мыңға жуық жатыр мойны обыры тіркеліп, осы дерттен 300 мың адам қайтыс болады. Денсаулық сақтау министрлігінің мәліметіне қарағанда, елімізде жыл сайын шамамен 1 900, күніне 5 жатыр мойны обыры тіркеледі. Жыл сайын бұл дерттен 600-ден астам, күніне 2 әйел көз жұмады.
«Облыста ұлттық екпе күнтізбесіне енгізілген өзгерістерге сәйкес, 2024 жылдың күзінен бастап 11 жастағы қыздарды адам папилломавирусына қарсы егу жоспарланып отыр. Дүниежүзілік денсаулық сақтау ұйымы 9-14 жас аралығындағы қыздарды екпеден өткізуді ұсынады. Өйткені осы жаста екпе алған тиімді болып есептеледі. Екпе 6 айлық үзіліспен 2 дозадан тұрады және қарсы көрсетілімдері болмаған жағдайда, дәрігердің тексеруінен кейін, ата-анасының немесе қамқоршысының келісімімен тегін жүргізіледі», - дейді Н.Мұстаев.
Оның айтуынша, адам папилломавирусына қарсы вакцинаның құрамында тірі вирустар жоқ, ағзаға түскенде, иммунитетті күшейтетін жекелеген вирус ақуыздары ғана бар. Вакцина әйелдердің репродуктивті денсаулығына ықпал етпейді және бедеулікке әкеліп соқпайды.
Адам папилломавирусы – әртүрлі органдардың тері мен шырышты қабаттарын зақымдайтын вирус. Кейбір жағдайларда инфекция папилломалардың пайда болуына әкеледі (сүйел тәрізді өсінділер). Адам папилломавирусы ауру адамнан терімен, шырышты қабаттармен немесе дене сұйықтықтарымен тікелей байланыс арқылы жұғады.
«Жатыр мойны обыры әйелдердің өміріне қатты әсер етеді. Тіпті ерте анықталғанның өзінде емдеуі қиын болып, өлімге әкелуі мүмкін. Адам папилломавирусына қарсы профилактикалық вакцинация жатыр мойны обырының дамуын болдырмауға көмектеседі. Бұл екпе 135 мемлекетте ұлттық егу күнтізбесіне енгізілген. Соның ішінде Өзбекстан, Қырғызстан, Түркменстан, Армения, Грузия, Молдова бар. Бұл оның тиімді екендігін білдіреді. Қазақстан аумағында 6,11,16 және 18 типті адам папилломавирусынан қорғанысты қамтитын, АҚШ-та өндірілген төрт валентті «Гардасил» вакцинасы қолданылатын болады. Аталған дерттің алдын алудың ең тиімді әдісі вакцинация екендігін атап өткім келеді», - деді Н.Мұстаев.
Еске сала кетейік, бұдан бұрын Оралда эвакуациялық пунктте жатқан 10 тұрғыннан қызылша ауруы анықталғанын жазған болатынбыз.
