Батыс Қазақстанда аң аулау кезінде 17 жастағы жасөспірім оқ жарақатын алды

ОРАЛ. KAZINFORM – Батыс Қазақстан облысында аң аулау кезінде 17 жастағы оқушы оқ жарақатын алды.

БҚО полиция департаментінің баспасөз қызметінен мәлім еткеніндей, оқиға 3 ақпан күні Ақжайық ауданы аумағында болды.

«Шамамен сағат 13.30-да аудан орталығы Чапаев ауылынан 11 шақырым жерде аң аулау кезінде 29 жастағы ер адам абайсызда аңшы мылтығынан 17 жастағы жасөспірімге қарай оқ атқан. Салдарынан жасөспірім ауруханаға жатқызылды. ҚР ҚК 114-бабы 3-бөлігіне (абайсызда денсаулыққа ауыр зиян келтiру) сәйкес сотқа дейінгі тергеу амалдары жүргізілуде. Аталмыш бап бойынша айыпты деп танылған адам бір мың айлық есептік көрсеткішке дейінгі мөлшерде айыппұл салуға не сол мөлшерде түзеу жұмыстарына не төрт жүз сағатқа дейінгі мерзімге қоғамдық жұмыстарға тартуға не бір жылға дейiнгi мерзiмге бас бостандығын шектеуге не сол мерзiмге бас бостандығынан айыруға жазаланады», деп хабарлады ведомстводан.

БҚО денсаулық сақтау басқармасының баспасөз қызметі бұл оқиға бойынша жедел жәрдемге хабарлама түспегендігін жеткізді.

Қазіргі кезде оқиғаның жай-жапсары анықталып жатыр.

Еске сала кетейік, бұдан бұрын Батыс Қазақстанда өз үйінен ер адамның денесі табылғанын жазған болатынбыз.