Батыс Қазақстанда ауыл жанында азап пен аштықтан қырылған адамдар жерленген
ОРАЛ. KAZINFORM – Батыс Қазақстан облысында азап пен аштықтан жаппай қырылған адамдар Теректі ауданы Придорожный ауылы маңында жерленген.
Өлкетанушы, «DANA» орталығының басшысы Жантас Сафуллиннің мәлім еткеніндей, Придорожный ауылында кеңес дәуірі кезінде №12 еңбекпен түзету лагері болған.
Осы ауылдың байырғы тұрғыны Шапағат Мырзахметұлының айтуынша, азап пен аштықтан қыста да, жазда да өлген адамдар 2 гектардай жерге жерленген.
«Бұлардың бәрі ақ төмпешік болып көрініп жатыр. Өйткені осы жерді қазғанда, ақ балшық шыққан», - дейді қария.
Қазіргі кезде Орал қаласында тұратын зейнеткер Кенжебай Рахимов әкесі Жұманың 1950 жылы сотталып, осы Придорожный ауылындағы еңбекпен түзеу лагерінде жазасын өтегенін жеткізді. Жазасын өтеушілердің барлығы барактарда тұрған.
БҚО-дағы саяси қуғын-сүргін құрбандарын толық ақтау жөніндегі өңірлік комиссияның жұмыс тобына жетекшілік еткен Ж.Сафуллиннің сөзіне қарағанда, архив деректері бойынша 1949 жылы аталмыш лагерьде 1130 адам жазасын өтеген. Осындағы карцер мен бұрынғы көкөніс қоймасы қазірге дейін сақталған. Сонымен қатар осы маңдағы Көбенсай ауылындағы лагерьден әйелдерді таңертең айдап әкеліп, көкөніс өсірілген плантацияда жұмыс істетіп, кешкісін кері әкетіп отырған.
«Бұл лагерьде саяси қуғын-сүргін құрбандары да жазасын өтеген. 1949 жылы Қылмыстық кодекстің 58-10-бабына сәйкес сотталған 55 адам болған. Оған қоса аштықтан өлмес үшін бір уыс бидай ұрлап, істі болғандар, жазықсыз жаланың құрбанына айналғандар қаншама. Придорожный ауылында адамдар жерленген деген жердің ауқымы үлкен. Сондықтан болашақта қазба жұмыстарын жүргізіп, жерленген адамдардың аты-жөнін барынша анықтау, орынды әлі де зерттеп, нақтылау үшін жұмыстану керек. Жаппай жерленген жер болса, міндетті түрде арнайы белгі қойылып, қоршау керек», - деді Kazinform тілшісіне Жантас Сафуллин.
Еске сала кетейік, бұдан бұрын тарихшының Батыс Қазақстанда саяси тұтқындар қамалған бірнеше лагерь болғаны туралы айтқанын жазған едік.
