Батыс Қазақстанда екі ер адам жол апатынан қаза тапты
ОРАЛ. KAZINFORM — Батыс Қазақстан облысында жол апатынан екі адам мерт болды.
БҚО полиция департаментінің баспасөз қызметінен мәлім еткеніндей, оқиға 1 қараша күні Бәйтерек ауданы аумағында болды.
«Шамамен сағат 08.00-де Орал-Озинки жолының 95-шақырымында жүргізуші «Тойота Гранвия» автокөлігінің руліне ие бола алмай қалған. Содан автокөлік аударылған. Оқиға орнында 58 жастағы жүргізуші мен 1960 жылғы ер адам көз жұмды. Аталған дерек бойынша сотқа дейінгі тергеу амалдары жүргізілуде. Қазіргі кезде оқиғаның мән-жайы анықталып жатыр», - деп хабарлады ведомстводан.
Тұрғындардың сөзіне қарағанда, автокөлікте белгілі кәсіпкер Владимир Охватов ағасымен бірге болған.
Еске сала кетейік, бұдан бұрын Оралда орман алабында өлі табылған әйелдің туыстары анықталғанын жазған болатынбыз.
