Батыс Қазақстанда консервіленген киік еті сатылымға шығады

ОРАЛ. KAZINFORM — Батыс Қазақстан облысындағы кәсіпорында киік етін консервілеп сату үшін дайындық жұмыстары жүргізіліп жатыр.

«Кублей» ЖШС директорының сыртқы экономикалық байланыстар жөніндегі орынбасары Азамат Сейтбаталовтың Kazinform тілшісіне мәлім еткеніндей, киік етінен консерві өндірудің өз жолдары бар.

— Атап айтқанда, алдымен ұшалар сүйектен ажыратылады. Содан кейін ет тазартылып, сіңірі де қалмайды. Сосын ет ұсақталып, қосымша ингредиенттермен араластырылады. Банкілерге салынып, герметикалық жабу, таңбалау және этикет жапсыру жұмысы жүргізіледі, — дейді А.Сейтбаталов.

Азамат Орынбайұлының сөзіне қарағанда, ауыл шаруашылығы жануарлары, мысалы, ірі қара малының етінен консерві жасаумен салыстырғанда, елеулі айырмашылық жоқ. 

Бірақ тексеруге көп уақыт қажет. 

— Күні бүгін кәсіпорында 250 тоннадан астам киік еті жинақталды. Ақбөкеннің ішек-қарнын, басқа да бөліктерін, терісін пайдаға асыру мәселесіне келсек, мұндай жұмыс жоспарланып отырған жоқ. Сонымен қатар киік етінен жасалған консервілер тек ішкі нарыққа ғана жөнелтіледі, — деп қосты А.Сейтбаталов. 

БҚО орман шаруашылығы және жануарлар дүниесі аумақтық инспекциясының басшысы Нұрлан Рахымжановтың нақтылауынша, күні бүгінге дейін Батыс Қазақстан облысында 62,5 мың бас киік ауланған.

— Соның ішінде 54,5 мың бас ақбөкен ұшасын өңірдегі ет өңдейтін кәсіпорындар, 8 мың басты көршілес Атырау облысындағы «Батыс KZ 25» ЖШС алды. Бірақ біздің облыстың кәсіпорындары да киік етін басқа өңірлерге жөнелтіп жатыр, — дейді Н.Рахымжанов.

Еске сала кетейік, бұдан бұрын Батыс Қазақстанда 30 мыңдай киік ауланғанын жазған едік. 

Сондай-ақ Ақтөбеде киік етіне сұраныс жоғары екендігі хабарланды.