Батыс Тракияда Рамазан айы барабан үнімен басталды

АСТАНА. KAZINFORM — Батыс  Тракия түріктері Рамазан айын ғасырлардан келе жатқан барабан үнімен қарсы алды, деп хабарлайды Анадолы.

Искече өңіріндегі Шахин ауылында дәстүрлі осман киімін киген барабаншылар, негізінен балалар, бесін намазынан кейін ауыл көшелерін аралап, Рамазан айының келгенін жариялады.

Барабан үнімен үй-үйді аралаған балалар ауылда мерекелік көңіл күй қалыптастырды.

Ауыл тұрғындары ерекше ықыласпен қарсы алған бұл шара Рамазан айының бірлік пен ынтымақ рухын нығайтты.

Ауыл мешітінде оқылған дұғаларда тұрғындар Рамазан айының ислам әлемі мен Батыс Тракиядағы түрік азшылығына игілік әкелуін тіледі.

Сонымен қатар Батыс Тракияда қызмет атқарып жүрген мүфтилер Рамазанға орай үндеу жасап, мұсылмандарды құлшылықты, бірлік пен ауызбіршілікті күшейтуге шақырды.

Искеченің сайланған мүфтиі Мұстафа Трампа өз үндеуінде Рамазанның рухани маңызын атап өтіп, бұл қасиетті ай бүкіл ислам әлемі мен адамзатқа бейбітшілік, тыныштық және жақсылық әкелсін деген тілегін білдірді.

Ол Рамазан – Құран түсе бастаған ай екенін еске салып, оразаның сабырды, мейірімділікті және жауапкершілік сезімін нығайтатынын айтты. Сонымен қатар, балаларды діни және ұлттық құндылықтар рухында тәрбиелеудің маңыздылығына тоқталып, ата-аналарды осы мәселеге мұқият болуға шақырды.

Гюмюльджиненің сайланған мүфтиі Ибрагим Шериф те өз жолдауында Рамазанның Батыс Тракиядағы мұсылман түрік қауымы өмірінде ерекше орын алатынын атап өтті.

Оның айтуынша, Рамазан «он бір айдың сұлтаны» ретінде қабылданады және бұл айда ауызашар, сәресі, тарауих намазы сияқты құлшылықтармен қатар, өзара жәрдемдесу мен ынтымақ сезімі де күшейе түседі.

Бұған дейін Лондон орталығындағы әйгілі Ковентри-стрит қасиетті Рамазан айына орай төртінші жыл қатарынан арнайы жарық шамдарымен безендірілгенін жазған болатынбыз.