«Батыс Еуропа - Батыс Қытай» транзиттік дәлізінің 606 шақырымын салу аяқталды - ҚР Көлік және коммуникациялар министрі
АҚТӨБЕ. 4 қазан. ҚазАқпарат - Бүгін Ақтөбе облысына Мемлекет басшысының Жолдауының қағидаларын түсіндіру мақсатында Көлік және коммуникациялар министрі Асқар Жұмағалиев келді.
Ол облыстық әкімдікте көліктік сала кәсіпорындары басшыларының қатысуымен кеңес өткізді.
Министр Мемлекет басшысының алға қойған міндеттерін іске асыру барысы, «Жұмыспен қамту-2020», «Бизнестің жол картасы-2020», аймақтарды, шағын қалаларды дамыту бағдарламаларының іске асырылуына ауқымды өту жайы баяндап берді.
Елдің көліктік-коммуникациялық кешенін дамыту бойынша жұмысқа ерекше назар аударылды.
«Жылдың аяғына дейін біз «Батыс Еуропа - Батыс Қытай» магистралінің 700 шақырымын тапсыруымыз керек. Бүгінде жолдың 606 шақырымы аяқталды, қалған 94 шақырымды таяу екі айда аяқтап, толық тапсырамыз. Жолдың сапасы жақсы болады», - деді министр.
А.Жұмағалиевтің айтуынша, жалпы алғанда елде құрылыс жұмыстары көлік магистралінің 1621 шақырымында жүргізілуде, оған барлығы 87 отандық және шетелдік компаниялар жұмылдырылды.
