Батыс Қазақстанда Құрбан айт мейрамы кеңінен аталып өтілуде

ОРАЛ. 15 қазан. ҚазАқпарат - Батыс Қазақстан облысында Құрбан айт мейрамы кеңінен аталып өтілуде.

15 қазан күні Оралдағы орталық мешітке халық көп жиналды. Жұртшылықты облыс әкімінің бірінші орынбасары Серік Шәпкенов Құрбан айтпен құттықтап, облыс басшылығы атынан ізгі тілегін жеткізді. ҚМДБ-ның БҚО бойынша өкіл имамы Руслан Сұлтанов айт намазына жиналған жамағатқа уағыз оқып, мұсылмандардың басты мейрамының мән-маңызына тоқталды.

Айт намазынан кейін құрбан шалу басталды. Биыл құрбан шалу Оралда төрт жерде, орталық, қалалық және Қызыл мешітте, сондай-ақ «Ел ырысы» базарында ұйымдастырылды. Қойды әр отбасы, сол секілді ірі малды бірігіп шалып жатқандар бар.

Құрбан айт мейрамы аудандарда да кеңінен тойлануда. Мереке үш күнге ұласпақ.