Батыс Қазақстанда жазушы-журналист Б.Ғұбайдуллиннің шығармашылық кеші өтті (Фото)
Өткен ғасырдың тоқсаныншы жылдарынан бері баспасөз саласында қызмет атқарып келе жатқан Б.Ғұбайдуллин республикалық «Ақ желкен», «Айқын», «Алтын орда» сынды газет-журналдарда жұмыс жасады. Көп жылдар бойы облыстық «Орал өңірі» газетінің ыстық-суығын көтеріп келе жатқан ол - қазір осы басылымның бас редакторы. Оның әр жылдары баспалардан «Күн бала», «Жиһанкез Ақкербез», «Жаныма жақын жағалау» атты кітаптары жарық көрген. Сондай-ақ туындылары «Ақ желкен», «Балбөбекке бәсіре», «Қолтаңба» сынды ұжымдық жинақтарға да енген. Б.Ғұбайдуллин, біріншіден, балалар жазушысы болса, екіншіден, жалпақ ел білетін журналист.
«Ақ Жайықтан батыр да, ақын да, жырау да аз шыққан жоқ. Марабай жырау осы Теректі өңірін мекендесе, Қызылжар елді мекенінде Жантөре хан Айшуақұлы жатыр. Жантөре хан ғана емес, соңына «Шалқымадай» керемет туынды қалдырған күйші. Ендеше, бұл топырақтың даласы да, моласы да киелі. Осындай жерде туып-өскен Бауыржан Ғұбайдуллин жасынан сөздің қадірін түсініп, бүгінде өз кеңістігіне көтерілген, заманның толғақты мәселелерін қозғай білетін қаламгерге айналды. Көркем шығарма жазып қана қоймай, Қазақстанның қоғам, өнер, спорт қайраткерлерінен бастап Шыңғыс ханға дейін небір тұлғалар жөнінде ой толғады. Олай болса, Ұлы дала төрінде сөзіміздің де, өнеріміздің де мәңгілік болатынының бір айғағы осы», деді белгілі ақын, Қазақстан Жазушылар одағы БҚО бөлімшесінің төрайымы Ақұштап Бақтыгереева.
Кеште Бауыржан Ғұбайдуллин шығармашылық жолы туралы тартымды әңгімелеп, оқырмандарының сауалдарына жауап берді.
Мерейтой иесін кластастары атынан БҚО әкімі аппаратының басшысы Марат Тоқжанов, Теректі ауданының әкімі Жеңіс Серікқалиев және басқалар құттықтап, ізгі тілектерін білдірді. Кеште Таңат Жексенбаев, Айбек Дәулетқалиев, Кәмшат Ғалымова сынды талантты жас әншілер сахнаға көтеріліп, кеш шырайын аша түсті.