Батысқазақстандық балуан халықаралық жарыста жеңімпаз атанды

ОРАЛ. ҚазАқпарат - Ақтау қаласында Қазақстан халқы Ассамблеясының 20 жылдығына және Қазақстанның еңбек сіңірген жаттықтырушысы М.Расуловты еске алуға арналған еркін күрестен жасөспірімдер, қыздар және ересектер арасында ашық халықаралық турнир мәреге жетті.

БҚО дене шынықтыру және спорт басқармасынан түскен мәліметке қарағанда, жарысқа Түркменстан, Ресей, Әзірбайжан, Өзбекстан және Қазақстан елдерінің балуандары қатысып, бақ сынады.

Осы байрақты бәсекеде батысқазақстандық Елшат Байыров 66 келі салмақта жеңімпаз атанды. Ол жартылай финалда әзірбайжан, соңғы белдесуде түркмен балуанын ұтты.