Батысқазақстандық каратэші әлем чемпионатының күміс жүлдегері атанды

ОРАЛ. ҚазАқпарат - Польшаның Быдгощ қаласында каратэ-додан жастар арасында мәреге жеткен әлем чемпионатында батысқазақстандық спортшы Дархан Темірәлиев күміс жүлдегер атанды.

БҚО дене шынықтыру және спорт басқармасынан түскен мәліметке қарағанда, аталмыш дүниежүзілік додаға әлемнің 46 елінен 3 мыңдай спортшы қатысты.

Дархан чехиялық, поляк, алжирлік және түркиялық қарсыластарын тізе бүктіріп, тек финалда өзбек спортшысына 1:2 есебімен есе жіберді. Сонымен қатар Қазақстан құрамасы командалық сында үшінші орынды иеленді. Мұнда тағы бір батысқазақстандық Бекарыс Елемесов те өнер көрсетті.

Айта кетейік, Д.Темірәлиев - өткен жылғы әлем чемпионатының қола жүлдегері.