Батысқазақстандық университетте дәрігерлік қабылдау орталығы ашылды

ОРАЛ. ҚазАқпарат - Қазақстан тәуелсіздігінің 25 жылдығына орай «100 нақты көмек» жобасы аясында 1 қараша күні Жәңгір хан атындағы Батыс Қазақстан аграрлық-техникалық университетінде жаңа дәрігерлік қабылдау орталығы ашылды, деп хабарлайды ҚазАқпарат.

Оның ашылу рәсіміне қатысқан облыстық денсаулық сақтау басқармасының басшысы Қамидолла Ирменовтің атап өткеніндей, бұдан екі жыл бұрын Зачаган кентінде №6 емхана пайдалануға берілген кезде 41500 адам тіркелсе, қазір бұл көрсеткіш үш есе дерлік артты. Былайша айтқанда, күні бүгін емханада 250 адамның орнына 700-ден астам адам қабылданып, ем алады. Яғни бұл емделушілер үшін қолайсыз. Жаңа дәрігерлік қабылдау орталығының ашылуы осының орнын толтырмақ. 

Кездесу барысында Қ.Ирменов пен Жәңгір хан атындағы БҚАТУ ректоры Нұрлан Серғалиев медициналық қызмет сапасын одан әрі жақсартуға уағдаласып, әріптестік туралы меморандумға қол қойды.

Айта кетейік, Зачаган кентіндегі №6 қалалық емхананың филиалы болып табылатын БҚАТУ-дағы медициналық орталық 5 мыңнан астам студентке, 2 мыңға жуық оқытушы-қызметкерлерге және осы маңдағы тұрғындарға қызмет көрсетеді. Тұрғындар екі учаскеге бекітіліп, оларды үш жалпы тәжірибе дәрігері қарайды. Оған қоса зертханалық-диагностикалық бөлімше іске қосылып, аурудың алдын алу шаралары мен скринингтер өткізілмек.

Орталықтың алғашқы жұмыс күні «Ашық есік» шарасы ұйымдастырылып, хирург, кардиолог, эндокринолог, гинеколог, терапевт мамандар тұрғындарды қабылдап, кеңес берді.