«Байқоңырда» жұмыс істейтін азаматтарды зейнетақымен қамтамасыз ету құқықтары қалпына келеді

АСТАНА. 24 қаңтар. ҚазАқпарат - «Байқоңыр» кешенінде жұмыс істейтін азаматтарды зейнетақымен қамтамасыз ету құқықтары қалпына келеді. Бүгін Парламент Сенаты қабылдаған «Қазақстан Республикасының кейбір заңнамалық актілеріне әлеуметтік қамсыздандыру мәселелері бойынша өзгерістер мен толықтырулар енгізу туралы» заңында аталған мәселе қамылды.

«Байқоңыр қаласындағы Қазақстан азаматтары Ресей кәсіпорындарында жұмыс істеп, оларға жалақы да ресейлік валюта арқылы беріліп келген еді. Соның өзі ондай азаматтарды біздің зейнетақы жүйемізден тыс қалдырған болатын. Бұл мәселені оң шешу үшін заңға тиісті өзгерістер енгізілді», - дейді Еңбек және халықты әлеуметтік қорғау министрі Серік Әбденов. Еске сала кетсек, Байқоңырда жұмыс істейтін ел азаматтарының зейнетақы проблемалары бірнеше жылдар бойы көтеріліп келген еді. Енді жаңа заңдағы өзгерістерге сәйкес, ондай азаматтарға зейнетақы Орталықтан тағайындалатын болады. Бұл ретте олардың табысы ресей рублін теңгеге аудару арқылы есептеледі.

Министрдің сөзіне қарағанда, заңда көзделген тағы бір жаңалық енді әйелдер жүктілігіне және бала күтіміне байланысты демалысқа шыққанда оған жәрдемақы тек әлеуметтік сақтандыру қорынан ғана емес, ұжымдық, еңбек келісімшарты арқылы да жұмыс берушіге қосымша төлеу шаралары белгіленеді.