Базалық мөлшерлеменің төмендеуі кредит пен ипотекаға қалай әсер етеді

АСТАНА. KAZINFORM – Базалық мөлшерлеменің төмендеуі халықтың несие немесе ипотекаға тұрғын үй алуына қалай әсер етеді? Бұл сұраққа Ұлттық банктің төрағасы Тимур Сүлейменов жауап берді.

«Кезекті базалық ставка төмендеді. Екінші деңгейдегі банктер осы мөлшерлемеге сүйене отырып, бизнес несиесі, ипотека, тұтынушылық несиелер және кредит түрлерін анықтайды. Сондықтан базалық мөлшерлеменің төмендеуі, несие өнімдерінің құнының төмендеуіне әкелуі тиіс», — деді Тимур Сүлейменов банкте өткен баспасөз мәслихатында.

Ұлттық банк төрағасының мәлімдеуінше, сыртқы инфляциялық орта жақсаруда. Бұл әлемдік азық-түлік нарықтарындағы бағалардың одан әрі төмендеуіне және орталық банктердің тежеуші саясатына байланысты.

«Бірақ инфляцияны өсіруі мүмкін кейбір факторлар мен тәуекелдер сақталып отыр. Тәуекелдер орнықты тұтынушылық сұранысқа, фискалдық ынталандыруға, жоғары инфляциялық күтулерге және реттелетін бағалардағы реформалардың аяқталмауына байланысты. Сонымен қатар сыртқы ортада Ресейдегі инфляцияның жеделдеуіне байланысты тәуекелдер байқалуда», — дейді ол.

Сондай-ақ, Т.Сүлейменов инфляцияның орнықты түрде төмендеуін қамтамасыз етіп, ортамерзімді келешекте инфляцияны 5%-ке жуық шамада тұрақтандыру қажет екенін айтты.

Бұған дейін хабарлағанымыздай, Ұлттық банк инфляцияны 15,25% дейін төмендету туралы шешім қабылдады.