Базарларды жаңғырту: сауда нысандарының иелері өз қаражаты есебінен жаңартады
АСТАНА. KAZINFORM — ҚР Сауда және интеграция министрлігі биыл елімізде 100 базарды жаңғырту жұмыстарына түсінік берді.
— Базарларды жаңғырту — бұл бірінші кезекте бизнестің әлеуметтік жауапкершілігі. Тек сатып алушылар үшін ғана емес, сатушылар үшін де қолайлы және қауіпсіз жағдайлар жасалуы тиіс. Базарлардың сыртқы келбеті қаланың сәулеттік келбетімен байланыстырылуы тиіс. Жаңғарту жұмыстары базар иелерінің өз қаражаты арқылы жүргізіледі, — делінген министрліктің Kazinform агенттігіне берген жауабында.
Бұған дейін Қазақстанда базарларды жаңғырту жұмысы басталатынын жазған едік.
Осы жұмыстар жергілікті әкімдіктермен, Мемлекеттік кірістер комитеті, төтенше жағдайлар қызметі, Мемлекеттік сәулет-құрылыс бақылау басқармасы және санэпидемиологиялық қызмет өкілдерімен бірлесіп атқарылады.
