Базарларды жаңғыртуға қаржы қайдан алынады – Сауда комитетінің жауабы

АСТАНА. KAZINFORM – Биыл елімізде 100 базар жаңартылады, ол үшін 5,3 млрд теңге бөлінді. Базарларды жаңарту жұмыстары туралы толығырақ Сауда және интеграция министрлігі сауда комитетінің төрағасы Айдар Әбілдабеков айтып берді.

— Базар иесі банктен несие алады, несие алған кезде Үкіметтің қолдауын алғым келеді деп ниет білдіресіз. Сол кезде екінші деңгейлі банк «Даму» қорымен байланысып, сіздің атыңыздан ұсыным береді, одан әрі «Даму» қоры қарайды, — деді Айдар Әбілдабеков орталық коммуникациялар қызметі алаңында өткен баспасөз мәслихатында. 

Сауда комитеті басшысының айтуынша, биыл базарларды жаңғыртуға 5,9 млрд теңге бөлінді. Аталған қаржы жалпы сауда субъектілерін жаңғырту, кеңейту, сауда саласында IT бағдарламалар жасауға жұмсалмақ.

— Алайда, қаражат әлі түспеді, наурызда түсуі керек, содан соң қолдау көрсетіледі бастайды, — деп қысқа қайырды спикер.

Сондай-ақ БАҚ өкілдері Сауда министрлігінің өкіліне базарлар жаңғыртылған соң, сауда орындарын жалға алу құны қымбаттап, оның әсері азық-түлік бағасының өсуіне алып келмей ме деген сауал қойды.

— Жалпы жаңғыртудан өтетін барлық базарға қолдау көрсетіледі. Сауда орындарын жалға алу құны базар иесіне байланысты, егер ол қаржылай шығынға келіп, оны өтеймін десе өзінің құзырында. Оның ісіне біз араласа алмаймыз. Ал азық-түлік бағасының өсуіне қатысты нақты айта алмаймын, ол нарықпен реттеледі, — дейді сауда комитетінің төрағасы.

Айта кетейік, биыл елімізде 100 базар жаңартылады. Алдымен Сауда және интеграция министрлігінің өкілдері барлық базарды аралап, тексеріп шығады. 

Сонымен қатар 2026 жылдан бастап уақтылы жаңартылмаған базар иелеріне айыппұл салына бастайды. 

Еске сала кетсек, жыл басында Үкімет басшысы бүкіл сауда қызметін, оның ішінде базарлар мен үй маңындағы шағын дүкендердің қызметін цифрландыру бойынша нақты ұсыныстар мен шаралар әзірлеу керектігін айтқан еді.