Бектенов: Қазақстан радиациядан зардап шеккендерге қолдауды күшейтуге ниетті
АСТАНА. KAZINFORM — ҚР Премьер-министрі Олжас Бектенов Хирошима префектурасының губернаторы Хидехико Юзакимен гуманитарлық ынтымақтастық мәселелері бойынша кездесу өткізді, деп хабарлайды Үкіметтің баспасөз қызметі.
Онда сауда-экономикалық ынтымақтастықты қоса алғанда, екіжақты өзара іс-қимылдың өзекті мәселелері, сондай-ақ гуманитарлық бастамалар мен жаһандық қауіпсіздікті нығайту жолында бірлесе күш жұмылдыру жайы талқыланды.
Қазақстан Жапониямен кеңейтілген стратегиялық әріптестікті дамытуға үлкен мән береді. Бұл бағытта ел Үкіметі Президент Қасым-Жомарт Тоқаев белгілеген міндеттерді дәйекті түрде жүзеге асыруда.
Кездесу барысында Хирошима префектурасы мен Абай облысы арасындағы байланысты одан әрі нығайту перспективалары қаралды. «Хирошима — Семей» бастамасын жалғастырудың, сондай-ақ Mayors for Peace халықаралық қозғалысы аясында білім алмасудың маңыздылығы атап өтілді. Тараптар Ядролық қаруды таратпау туралы шарттың (ЯҚТШ) алда өтетін Шолу конференциясы шеңберінде одан арғы өзара іс-қимылға әзір екендіктерін білдірді.
Хирошима префектурасының губернаторы ядролық қаруды таратпау мәселелерінде Жапония мен Қазақстанның ынтымақтастығы аса маңызды екенін атап өтті.
— Біз Қазақстанның халықаралық аренадағы қолдауын жоғары бағалаймыз. Сапарымыздың бір мақсаты — достықты нығайту. Екі елде де ядролық қару салдарынан жиналған мол тәжірибе бар. Біз Хирошималықтар өзімізді маңызды миссиямыз бар жандармыз деп санаймыз, ол — әлемді ядролық қарудан азат ету жолында тынымсыз еңбек ету. Қазақстан — Ядролық қаруды таратпау туралы қозғалыстың Орталық Азиядағы мүшесі, — деді Хидехико Юзаки.
Өз кезегінде Үкімет басшысы Қазақстан радиациядан зардап шеккендерді медициналық және әлеуметтік қолдау, сондай-ақ радиациялық медицина саласындағы технологияларды әзірлеу және енгізу сияқты бағыттар бойынша Жапониямен ынтымақтастықты тереңдетуге ұмтылады.
— Біз Жапония Үкіметіне Семейдегі ядролық сынақтар салдарымен күресу үшін өтеусіз грант беру ниетіне алғыс білдіреміз. Бұл бастама медициналық көмек көрсету сапасын арттыруға орнықты түрде ұзақмерзімді әсер ететініне сенімдіміз, — деп атап өтті Олжас Бектенов.
Айта кетейік, 2024 жылдың қорытындысы бойынша Қазақстан мен Жапония арасындағы тауар айналымы $1,8 млрд-ты құрады. Қазіргі уақытта Қазақстанда 60-тан астам жапондық компания табысты жұмыс істеуде. Соңғы 20 жылда жапон бизнесі ҚР экономикасына шамамен $8,3 млрд инвестиция салды. Toyota, Hitachi, Marubeni және басқа да компаниялармен ірі жобалар жүзеге асырылды.
Бұған дейін Премьер-министр Олжас Бектенов азық-түлік бағасын тұрақтандыру үшін мемлекеттік маркетплейс әзірлеуді тапсырды.
