«Беларусь 24» телеарнасы Қазақстан мен Ресейде хабар тарату аясын кеңейтуде

АСТАНА. ҚазАқпарат - Беларусьтің бірден-бір жерсеріктік «Беларусь 24» телеарнасы Қазақстан Республикасы мен Ресей Федерациясында өзінің географиялық хабар тарату аясын кеңейтуде. Бұл туралы Белтелерадиокомпания хабарлады, деп жазады БЕЛТА.

Телеарнаның Қазақстанда хабар таратуы аясын кеңейту бойынша белсенді жұмыс жүргізілуде. 1 шілдедегі жағдай бойынша «Eurasia Media Distribution» ЖШС компаниясымен келісімшарт жасалды. Бұл компания Қазақстан территориясында 50-ден астам телеарнаның дистрибьюторы болып табылады және жалпы абоненттік базасы 300 мыңнан асатын 95 кабельдік операторлармен жұмыс жасайды. Сонымен қатар «Беларусь 24» телеарнасының хабарларын Қазақстандағы ірі оператор желісі «Алма-ТВ» компаниясы арқылы тарату бойынша да келіссөздер жүргізілуде.

Ал 2015 жылдың 1 мамырынан бастап «Беларусь 24» телеарнасы ірі ресейлік «Ростелеком» электр байланысы операторының желісінде хабар таратады. Ағымдағы жылдың 6 айы ішінде «Беларусь 24» телеарнасының Ресейдегі көрермендер аудиториясы 1 млн. 200 мың абоненттен астам көлемде ұлғайды. Белтелерадиокомпания әлемдегі бірден-бір беларусьтік халықаралық «Беларусь 24» жерсеріктік телеарнасының хабар тарату аясын кеңейту бойынша белсенді жұмыстар жүргізуде.