Белгілі ғалым Н.Қайыпова Орал қаласында болды

ОРАЛ. Маусымның 22-сі. ҚазАқпарат /Елжан Ералы/ - Белгілі ғалым, медицина ғылымдарының докторы, профессор Нина Қайыпова Орал қаласында болды. Сапар барысында мейманды облыс әкімі Бақтықожа Ізмұхамбетов қабылдады,

деп хабарлайды ҚазАқпарат тілшісі.

Кездесуде өңірдегі денсаулық сақтау саласының жай-күйі, әсіресе, Елбасы тапсырмасына сәйкес ана мен сәби өлімін болдырмау, медицина кадрларымен қамту мәселесі кеңінен сөз болды.

Нина Қайыпованың атап өткеніндей, оған Батыс Қазақстан облысы етене жақын. Өйткені әкесі Әмір Молдағалиұлы Қазталов ауданының тумасы.

Көп жылдар бойы Қазақ мемлекеттік медицина институтында ұстаздық еткен, сондай-ақ жиырма жыл бойы Қазақстан Денсаулық сақтау министрлігі бас акушер-гинекологы болып еңбек еткен Н.Қайыпова облыстық перинаталдық орталықта болып, өңір дәрігерлерімен ой бөлісті.