Бельгия 140,8 млн еуроға мини-дрондар сатып алады

АСТАНА. KAZINFORM — Бельгияның Қорғаныс министрі Тео Франкен елін «өткен дәуірдің соғыстарына емес, болашақ соғыстарға дайындалып жатыр» деп сипаттап, 140,8 млн еуроға мини-дрондар сатып алу жоспарланғанын мәлімдеді. Бұл туралы Анадолы хабарлады.

Франкен әлеуметтік желідегі хабарламасында Қорғаныс министрлігінің мини-дрондарды сатып алу жоспарын «тарихи» деп атады.

— Қорғаныс жүйесін өткен соғыстарға емес, болашақ соғыстарға дайындап жатырмыз, — деді Франкен, мини-дрондарды 140,8 млн еуроға сатып алатынын хабарлап.

Бельгиядағы БАҚ деректеріне сәйкес, мини-дрондар НАТО-ның Қолдау және жабдықтау агенттігі (NSPA) арқылы сатып алынады, ал 140,8 млн еуро сатып алу, техникалық қызмет көрсету және техникалық мамандарды оқытуды қамтиды.

Мини-дрондар барлау және бақылау мақсатында қолданылатын болады және Румыния мен Литвадағы бельгиялық әскерлерді қолдау үшін пайдаланылады.

Бұдан бұрын хабарланғандай, Бельгияда премьерге қарсы лаңкестік әрекет жоспарлаған үш күдікті ұсталды.