Бельгияда биылдан бастап мектептерде смартфондарды қолдануға тыйым салынады

АСТАНА. KAZINFORM — 2025–2026 оқу жылдары аралығында Бельгияның бастауыш және орта мектептерінде ұялы телефондар мен басқа электрондық құрылғыларды қолдануға қатысты жалпыұлттық тыйым енгізіледі, деп жазады Анадолы.

Жергілікті БАҚ-тың хабарлауынша, бұл тыйым елдің барлық аймақтарында күшіне енеді және оқу мақсатынан тыс ұялы телефондар мен басқа да құрылғыларды пайдалануға қатысты болады. Медициналық қажеттілік немесе төтенше жағдай сияқты ерекше жағдайларда ғана оқушыларға телефон қолдануға рұқсат беріледі.

Бельгиядағы үш тілдік қауымдастықтың әртүрлі ережелері болса да, бұл жаңа тыйым бүкіл ел аумағында қолданылады. Сонымен қатар, мектептер тәртіп ережелерін бұзғандарға қандай тәртіптік шара қолдану керектігін өздері анықтай алады.

Француз тілді қауымдастық

Валлония мен Брюссельдегі француз тілінде оқытатын мектептерде бастауыш мектептер үшін телефон қолдануға тыйым салу 2024–2025 оқу жылынан бастап күшіне енді. Ал орта мектептерде телефон қолдану «шектеулі» түрде рұқсат етілген.

Жаңа қаулыға сәйкес, 2025–2026 оқу жылында балабақшаларда, бастауыш және орта мектептерде ойын-сауық мақсатында телефон мен басқа да электронды құрылғыларды қолдануға толық тыйым салынады.

Неміс тілді қауымдастық

Неміс тілді өңірде 2025–2026 оқу жылынан бастап ұялы телефондарды, смарт-сағаттарды және басқа да қосылған құрылғыларды сабақ кезінде ғана емес, үзіліс уақытында да қолдануға тыйым салынады.

Нақты ережелер мен тәртіптік шараларды әр мектеп өзі белгілейді.

Фламанд қауымдастығы

Нидерланд (фламанд) тілінде сөйлейтін өңірде тыйым балалар бақшалары мен бастауыш мектептерде қазірдің өзінде қолданыста.

Енді бұл шектеу орта мектептерге де кезең-кезеңімен енгізіледі: орта мектептің алғашқы екі сыныбында ұялы телефондар мен смарт-сағаттарды қолдануға толықтай тыйым салынады, ал үшінші сыныпта – тек сабақ уақытында қолдануға болмайды.

Бельгия мектептерінде оқу жылы француз тілді мекемелерде 25 тамызда, ал қалған мектептерде 1 қыркүйекте басталады.

Бұдан бұрын Бельгия парламентінің мүшелері отбасыларды біріктіруді шектейтін үкіметтік заң жобасын қабылдады. Бұл схема елде заңды түрде тұратын шетел азаматтарына бір немесе бірнеше отбасы мүшелерін әкелуге мүмкіндік береді