Берлин Тель-Авивке қару жеткізуді тоқтатуы ықтимал
АСТАНА. KAZINFORM — Германия Израильге қару-жарақ экспортын қайта қарауы мүмкін. Бұл туралы Германияның сыртқы істер министрі Йоханн Вадефул мәлімдеді, деп Kazinform агенттігінің меншікті тілшісі.
Süddeutsche Zeitung газетіне берген сұхбатында Германия сыртқы істер министрі Йоханн Вадефул Газа секторында халықаралық гуманитарлық құқықтың бұзылуы мүмкіндігіне байланысты Израильге қару-жарақ экспортын қайта қарау туралы жариялады.
«Біз Газа секторында болып жатқан жағдайдың халықаралық гуманитарлық құқықпен сәйкестігін зерттеп жатырмыз», – деді Вадефул. – «Болашақта қару жеткізу осы шолудың нәтижелеріне сүйене отырып шешіледі».
Одан «бұл экспорттың ішінара тоқтауына әкеле ме?» деп сұрағанда, ол:
«Дәл осыны сол формулировка меңзеп тұр», – деп жауап берді.
Вадефул Израильдің өзін-өзі қорғау құқығын, соның ішінде Германия қару-жарақ жүйелерімен қорғану құқығын (Йемендегі хуситтерге, Ливандағы «Хезболла» тобына немесе Иранға қарсы) қолдайтынын атап өткенмен, Газа секторындағы гуманитарлық жағдайды қатты сынға алды. Бұл жерде Израиль ХАМАС содырларымен 2023 жылдың қазан айындағы қатыгез шабуылдан кейін соғыс жүргізіп келеді.
«Газаға жеткізілген гуманитарлық көмек – теңіздегі тамшыдай ғана», – деді ол. – «Мұнда негізгі адам құқықтарын қамтамасыз ету туралы сөз болып отыр. Ең алдымен аурулар, әлсіздер мен балалар көз жұмады».
«Сол себепті», – деп қосты Вадефул, – «біз өз риторикамызды өзгерттік және болашақта саяси қадамдарымыз да өзгеруі мүмкін».
Қару-жарақ жеткізілімдерін тоқтату туралы шақырулар Германияда – Еуропадағы Израильдің дәстүрлі сенімді одақтасы ретінде – қолдау тауып отыр. Әсіресе бұл бастаманы солшыл-центристік социал-демократ депутаттар қолдауда. Алайда консервативті канцлер Фридрих Мерц риторикасын қатаңдатқанына қарамастан, экспортқа қатысты нақты міндеттемелерді мойнына алған жоқ.
2023 жылы Германия Израильге 326,5 миллион еуро көлемінде қару-жарақ экспортын мақұлдаған – бұл алдыңғы жылдармен салыстырғанда едәуір өскен. Бірақ 2024 жылы ел ішінде және халықаралық деңгейде өсіп келе жатқан құқықтық және саяси қысым салдарынан бұл келісімдер көлемі екі есе азайған.
Алдағы аптада Израильдің сыртқы істер министрі Гидеон Саард Берлинге келеді деп күтіледі.
БҰҰ мәліметінше, Израильдің Газа секторын қоршауы бұл өңірді «Жер бетіндегі ең аш өңір» деп атауға негіз болып отыр.
Бұған дейін хабарланғандай, Германияда сәуір айында күн энергиясы негізгі электр энергия көзіне айналды.
