Бес айда полиция қызметкеріне қарсылық көрсету бойынша 200-ден астам қылмыстық іс қозғалды

АСТАНА. 10 шілде. ҚазАқпарат - Үстіміздегі жылдың бес айында полиция қызметкерлерінің қызметтік міндеттерін атқару кезінде оларға бағынбау мен қарсылық көрсету бойынша 475 факті тіркелді.

Олардың 211-і бойынша қылмысты істер қозғалып, 107-сі сотқа жіберілді. Бұл туралы ҚР ІІМ мәліметтерінде хабарланды.

Шілде айының басынан бері республика аумағында полиция қызметкерлеріне қызмет барысында қарсы күш көрсету мен бағынбау бойынша сегіз факті тіркеліп отыр. Олардың алты фактісіне қатысты қылмыстық істер қозғалды (ҚР ҚК 321-бабы.).

Полиция қызметкерлерінің қызметтік міндеттерін атқару кезінде олардың өмірі мен денсаулығына қауіп төнетін зорлық-зомбылық көрсету үшін 7 жылға дейін бас бостандығынан айыру көзделген.