Бейбіт Жұқаев Истбурн турнирінің іріктеу сатысын сәтті бастады
АСТАНА. ҚазАқпарат – Қазақстандық, әлемнің 236-ракеткасы Бейбіт Жұқаев Истбурн (Ұлыбритания) ATP 250 турнирінің іріктеу сатысын сәтті бастады, деп хабарлайды ҚазАқпарат тілшісі.
Қазақстандық теннисші бастапқы кездесуін дүниежүзілік рейтингте 565-орында тұрған ұлыбританиялық Даниэль Литтлмен өткізді.
Бейбіт Жұқаев жергілікті теннисшіні 6:4, 6:4 есебімен қапы қалдырды.
Бір сағаттан астам уақытқа созылған матчта қазақстандық спортшы 8 эйспен бірге 4 брейк-пойнттың үшеуін мүлт жіберген жоқ. Қарсыласы 7 эйс, 1 брейкпен көзге түсті.
Б.Жұқаев іріктеу сайыстарының финалында әлемнің 80-ракеткасы, швейцариялық Марк-Андреа Хуслермен кездеседі. Оны жеңсе, өз спорттық жолында алғаш рет ATP 250 додасына жолдама алады.
Аталмыш жарыс 26 маусым – 1 шілде аралығында өтеді.
Өткен жылы мұнда америкалық Тейлор Фритц чемпион атанған еді.
Еске сала кетейік, бұдан бұрын Александр Недовесовтің Ұлыбританиядағы жарыстың жеңімпазы атанғанын жазған болатынбыз.
Сондай-ақ Александр Бублик Германиядағы жарыстың финалына шықты.
Александр Бублик Германиядағы турнирдің финалына шыққаннан кейін өте бақытты екендігін жеткізді.
