Бейбіт Атамқұлов қазақ-өзбек бизнес қауымдастығын құруды ұсынды

АСТАНА. KAZINFORM – Қазақстанның Өзбекстандағы Төтенше және өкілетті елшісі Бейбіт Атамқұлов Қазақстан-Өзбек іскерлік кеңесінің жиынында қазақ-өзбек бизнес қауымдастығын құруды ұсынды.

«Екі арадағы бірлескен кәсіпорындар санының өсу қарқынын, өзара әріптестіктің әлеуетін ескеріп, Қазақстан-Өзбек бизнес қауымдастығын құратын уақыт келді деп есептеймін. Бұл қауымдастық бизнес пен мемлекеттің тиімді ықпалдастығының платформасына айнала алады. Яғни, екі арадағы әріптестік бизнесті қолдауға айқынырақ бағытталады деген сөз. Маған бүгінге дейін Өзбекстанда тіркеліп, жұмыс істеп жүрген 20-дан астам бизнес өкілі осындай комиссия құрып, мемлекеттік органдармен күнделікті туындап жататын өзекті мәселелер бойынша осы қауымдастық арқылы жұмыс істесек деген өтінішпен жүгінді», - деді ол.

Дипломаттың айтуынша, аталған қауымдастық екі арадағы еңбек миграциясын реттеуге де септігін тигізе алады. 

«Бұл қауымдастық озық практикалар мен тәжірибе алмасудың көпірі болып, жаңа жобалардың дамуына, экономикалық байланыстарымызды нығайтуға жол аша алады. Осы бизнес қауымдастық арқылы екі елдегі жаңа жобалар туралы мәлімет алып отыруға және мамандар іздеп табуға болады. Қазір Өзбекстан жоғары білікті қазақстандық мамандарды іздеушілер көп», - деді елші.