Бейжің мен Тяньцзинь су тасқынына байланысты төтенше жағдай режимін енгізді

БЕЙЖІҢ. KAZINFORM — ҚХР Су ресурстары министрлігі орталық бағынысты Бейжің және Тяньцзинь қалаларында 4-інші деңгейдегі су тасқынына қарсы төтенше жағдай режимін енгізді. Бұл туралы Xinhua жазды

Ведомствоның мәліметінше, болжанған нөсер жауын мен ықтимал су тасқынына байланысты Қытайдың солтүстігінде орналасқан Бейжің-Тяньцзинь-Хэбэй аймағында төтенше жағдай режимі енгізілген.

26-28 тамыз аралығында Қытайдың аталған аймақтарында нөсер жауын жауады деп болжанған, бұл бірқатар шағын және орта өзендерде қауіптілік деңгейінен асу қаупін арттырып отыр. 

Бейжіңде 60 мыңға жуық жергілікті тұрғын эвакуацияланып, Қытай астанасының таулы аймақтарындағы туристік орындар жабылды. 3 мыңнан астам нысанда құрылыс жұмыстары тоқтатылды. Бейжіңде циклонның ықтимал зардаптарын жою үшін 200 мыңға жуық муниципалдық қызметкер жұмылдырылды.

Еске сала кетсек, Қытай астанасы Бейжіңде 26 шілдеден бастап нөсер жауын құйды, арты су тасқынына ұласты. 28 шілдеде қызыл дабыл жарияланып, тұрғындарға қажетсіз сыртқа шықпау, ал кәсіпорындарға қызметкерлерді жұмысқа шақырмау туралы ескерту жасалды. 29 шілдедегі соңғы мәліметтерге сүйенсек, Бейжіңдегі су тасқыны 30 адамның өмірін қиған.

Нөсер жауынға байланысты Бейжіңде 82 мыңнан астам адам эвакуацияланды.

Бұған дейін Қытайдың солтүстігіндегі ірі портты мегаполис — Тяньцзинь қаласында 31 тамыз бен 1 қыркүйек аралығында өтетін Шанхай ынтымақтастық ұйымының тарихтағы ең ауқымды саммитіне дайындық жұмыстары аяқталуға жақын екенін жазған болатынбыз.