Қонаевтағы Бөлек ата кесенесі мемлекетке қайтарылды

ҚОНАЕВ. KAZINFORM –  Қонаев қаласының әкімдігі Бөлек ата кесенесінің мемлекетке қайтарылғанын хабарлады.

Аталған нысанды орналастыру үшін алаңы 1,5941 га жер учаскесі 2004 жылы Қапшағай қаласы (қазіргі Қонаев) әкімінің қаулысымен жекеменшікке - «Бөлек батыр Жалайыр» қоғамдық қоры ЖШС-на берілген.

Ал 2022 жылғы 26 тамызда Алматы қаласының мамандандырылған ауданаралық экономикалық сотының шешімімен «Бөлек батыр Жалайыр» қоғамдық қоры мәжбүрлі түрде жойылған.

Арада бір жыл өткен соң нысан иесіз мүлік ретінде есепке алынған.

- Осыған байланысты Қонаев қаласының әкімдігі сотқа жүгінген. Әкімдік нысанды иесіз және коммуналдық меншікке түскен деп тану туралы уәж айтқан. Ал үшінші тұлғаның өкілі бұл талаппен келісіп, мемориалды кешеннің маңызы зор және оны күтіп ұстау үшін шығындар қажет екенін, қазіргі таңда кешеннің қараусыз екенін көрсеткен. Сот ҚР қолданыстағы заңнамаларына сәйкес, әкімдіктің талабын қанағаттандырып, нысанды мемлекет меншігіне қайтаруды ұйғарды, - деп жазды ведомстводан.

Бұл кешен мәдениет бөлімінің иелігіне өтіп, мемлекет қорғауында болады.

Айта кетейік, Алматыдағы балалар үйі Қонаев қаласына көшіріледі.