Биыл елімізде Starlink жүйесін орнату жалғасады
АСТАНА. KAZINFORM – Еліміздің біраз мектебіне Starlink интернет жүйесі тартылды. Бұл жүйе қаншалықты өзінің нәтижелігін көрсетті? Бұл сұраққа ҚР Цифрлық даму, инновациялар және аэроғарыш өнеркәсібі министрлігі жауап берді.
- Starlink спутниктік интернеті Қазақстан мектептерінде кеңжолақты желіні қамтамасыз ету мақсатында пилоттық жоба аясында енгізілді. 2024 жылдың қорытындысы бойынша 1812 мектепке жабдық орнатылды. Сонымен қатар 65 мектепте қызмет көрсету тоқтатылды, оның ішінде 30 мектеп жабылды, ал 35 мектепте талшықты-оптикалық байланыс желісі (ТОБЖ) тартылды, сондықтан олар үшін Starlink қажеттілігі жойылды. Жалпы алғанда, Starlink интернеті шалғайдағы мектептерді интернетпен қамтамасыз етуде тиімді шешім болды. Қазіргі уақытта 1678 мектеп Starlink жүйесін пайдаланып отыр, - делінген министрліктің Kazinform агенттігіне берген жауабында.
Айта кетейік, ведомство биыл Қазақстан аумағында Starlink жүйесін орнату жалғасатынын нақтылады.
- 2025 жылы Starlink жүйесін орнату жалғасады. Оқу-ағарту министрлігімен (ОАМ) бірлесіп, мектептердің тізімі жаңартылып жатыр. Қазіргі кезде 1678 мектепте Starlink жабдығы жұмыс істеп тұр және жоспар бойынша қосымша 110 мектеп спутниктік интернетке қосылады. Нәтижесінде жалпы тізім 1788 мектепті қамтиды, - деп аталып өткен Цифрлық даму министрлігі мәліметінде.
Бұған дейін спутниктерді Қазақстаннан экспорттауға қатысты қай елдермен келісім бар екенін жазған едік.
