Биыл Қазақстаннан Өзбекстанға бағытталған ақша аударымдары артты

ТАШКЕНТ. KAZINFORM – Жыл басынан бері Өзбекстанға бағытталған ақша аударымдарының көлемі 25%-ға өсіп, 6,5 млрд долларға жетті, деп хабарлайды Kazinform агенттігінің Ташкенттегі меншікті тілшісі Әлихан Асқар.

Өзбекстан Орталық банкінің төрағасы Мамаризо Нурмуратов БАҚ өкілдеріне арналған баспасөз маслихатында мәлім еткеніндей, аударымдардың көлемі алдын ала жасалған болжамнан 2 есе асып түсті. Қаржы реттеушісі алғашқы жартыжылдықта өсім 11-12% көлемінде болады деп жоспарлаған. 

Бұл ретте, Мамаризо Нурмуратов елге ақшалай түсімдер бойынша Ресейдің үлесі 2022 жылғы 81-82%-дан 77%-ға қысқарғанын атап өтті.

Өз кезегінде Қазақстаннан Өзбекстанға жасалған ақша аударымдарының көлемі 347 млн долларға өсті. Ал АҚШ-тан – 271 млн долларға, Оңтүстік Кореядан - 267,3 млн долларға артып отыр. Бұған қоса, Германия мен (+64%) Польшадан (+93%) ақша түсімдері ұлғайды.