Биыл күзде қазақ тілін тегін үйрететін жасанды зейін қосымшасы қолданысқа беріледі

АСТАНА. KAZINFORM – Жаңа оқуы жылында QazaqLingo атты қазақ тілін тегін үйрететін үш деңгейлі жасанды зейін қосымшасы қолданысқа беріледі. Жобаның авторы – Халықаралық «Қазақ тілі қоғамы».

- Бұл – біздің өз күшімізбен жасалып жатқан, тіл үйренуге арналған қосымша. Оның мазмұндық негізі – өзіміз құрастырған, «Үйренуге оңай қазақ тілі» деп аталатын өз бетінше тіл оқуға арналған үш деңгейлі әдістемелік құрал. Алдыңғы жылы ІТ университет студенттері арасында байқау жариялап, солардың күшімен жаңа айтып өткен мазмұн негізінде бір нұсқасын жасадық. Оны да барынша тиімді, барынша үнемді жолмен іске асыруға тырыстық. Студенттер барын салды. Дегенмен де тәжірибе болмағаннан кейін әлі де жетілдіруді талап ететін тұстары бар. Сондықтан оны қазір сынақ түрінде ортаға салдық. Адамдар қолданып көріп, пікірін айтып жатыр. Дизайн, мүмкіндіктер тұрғысынан жетілдіретін тұстарын көріп, соны жылдың ортасына дейін аяқтап, жаңа оқу жылында көпшілікке таныстырмақшымыз, - деді осы қоғамның президенті Рауан Кенжеханұлы Kazinform агенттігіне берген сұхбатында.

Мемлекеттік тілді үйден шықпай-ақ, тегін үйренемін деушілер қосымшаны тегін жүктеп, тегін пайдалана алады.

- Қосымша тегін жұмыс істейді. Соның негізінде қосымшаны қолданушылардың қауымдастығын да құрғымыз келеді. Кейде тегін дүниенің қадіріне жете алмай қаламыз, сондықтан келген адамдарды тұрақты пайдаланушыға айналдырудың амалдарын қарастырып жатырмыз. Жалпы ол қосымша қолданушының талабына, технологиялардың дамуына байланысты жетілдіріле береді, - деді ол.

Айтуынша, әуелде бұл жобаны Duolingo платформасы арқылы іске асыру жоспары болған.

- Шынын айтқанда, әуелі біз бүкіл әлем қолданатын, көп тілді оқытатын осындай платформаларды қазақшалағымыз келген. Duolingo деген платформаны естуіңіз бар шығар. Ірі-ірі, ағылшын, испан, қытай сияқты қырық шақты тілді оқыту әдістемелері жүктелген. Қазір ең кең қолданылатын тіл үйрену платформасы осы. Олармен бірнеше рет байланыс орнатуға қадам жасап көрдік. Америкада жүрген бауырларымызды да қостық. Бірақ әзірге ол платформа иелерінің қазақ тіліне қызығушылығы жоқ. Басқа да қызметтерді зерттеп, сөйлесіп жатырмыз. Әзірше өз қосымшамызды дамыта береміз. Бұл да тіл үйренуші ортаға жақсы көмек болады деп сенеміз. Өйткені әдістемесі өзімізге ұнайды, - деді «Қазақ тілі» қоғамының президенті.

Сұхбаттық толық нұсқасын мына сілтемеден оқуға болады.